2000年史詩戰爭電影《帝國驕雄》睽違24年再推續集，預計今年11月28日正式上映，最近Ridley Scott接受法國雜誌《Premiere》訪問時就透露，佢已經著手計劃緊《帝國驕雄3》。

Ridley Scott表示：「我已經開始思考緊《帝國驕雄3》嘅故事，我認真㗎，我已經開始動工！《帝國驕雄2》結局會令人聯想起1972年電影《教父》，亦即係Michael Corleone(第二代教父)接任一份佢唔想要既工作，並疑惑地詢問：『爸爸，我應該點做好？』，所以下集《帝國驕雄》將會講述一個人想擺脫當前處境嘅故事。」

然而，目前只係Ridley Scott單方面話構思緊第三集，片商派拉蒙影業並未落實開拍。正如大部份荷里活電影，能否開拍第三集一切都決取於《帝國驕雄2》表現，但Ridley Scott似乎相當有信心，早前接受《Empire》雜誌訪問時就表示《帝國驕雄2》係佢生平拍過最好嘅電影之一，動作場面亦比《拿破崙》任何一個片段浩大。至於觀眾實際反應如何，就要等到上映先知啦。

《帝國驕雄2》故事接續前作，講述王后Lucilla（Connie Nielsen 飾）兒子Lucius（Paul Mescal 飾）面對首集慘痛經歷後，被送到非洲北部王國努米底亞過著平靜生活，以躲避羅馬朝廷官場鬥爭。然而Lucius長大成人後，由Pedro Pascal所飾演嘅羅馬將軍Marcus Acacius大舉入侵努米底亞，並將其俘虜置於羅馬競技場進行生死搏鬥。面對暴帝Caracalla（Fred Hechinger 飾）與Geta（Joseph Quinn 飾）嘅鐵腕統治，心中充滿怒火嘅Lucius決心要討回本應屬於佢嘅權力及榮譽，繼而展開一場復仇大計。