國際名導Christopher Nolan新作再有消息傳出！除咗鎖定Matt Damon擔任主角，Tom Holland亦有望加盟演出，題材可能係以1920年代為背景嘅吸血鬼電影。

據外媒《THR》報導，Christopher Nolan下一部電影將與環球影業再度聯手製作，預計最快明年初開拍，2026年7月17日上映。除咗早前提到Matt Damon正洽談擔任主角，最近有消息指Tom Holland亦有望加盟演出。順帶一提，Tom Holland嚟緊仲要拍《蜘蛛俠4》及《復仇者聯盟》續集，若然事成，可以預計佢將會非常繁忙。

雖然電影劇情細節尚未公開，但有消息人士透露，故事背景並不會設定在現代，可能係過去或未來。目前業界對Nolan新作題材主要有兩種猜測，一種係類似1983年《Blue Thunder（藍霹靂）》嘅直昇機電影，而另一種則係以1920年代為背景嘅吸血鬼恐怖電影，類似由Ryan Coogler執導、明年3月上映嘅《Sinners》。

《Sinners》劇照

事實上，Christopher Nolan在去年2月接受訪問時，曾表示自己有意拍攝恐怖片，惟缺乏好嘅Idea：「我認為恐怖片非常有趣，因為佢非常依賴電影拍攝手法，激發觀眾內心對某些事物嘅本能反應，所以某程度上，我好很樂意拍一部恐怖片，但一部好嘅恐怖片需要一個出色嘅idea，而呢種Idea相當罕見，我暫時未搵到一個合適嘅故事題材。」或者經過一年多時間，Nolan已經諗到一個啱心水嘅故事。