當年《Game of Thrones》可謂高開低走，最後兩季口碑暴跌，令呢套一代神劇未能完美收官。近年開播嘅衍生劇《House of The Dragon》雖然仍屬上乘之作，但就已經不復當年人氣。不過近日接連有《Game of Thrones》相關消息出現，先係傳聞Warner Bros. （WB）與HBO有意開發電影版嘅《Game of Thrones》，然後小說原作者George R.R. Martin又有意將HBO放棄嘅衍生劇寫成小說。或者未來大家會見到更多《Game of Thrones》相關嘅作品出現？

首先，據《The Hollywood Reporter》報導，多個消息來源均指WB與HBO正在靜悄悄地開發一部以George R.R. Martin筆下魔幻世界為主嘅電影。由於目前電影處於極早期籌備階段，所以無論係台前幕後人選又或故事大綱等一概都係未知之數，唯一能夠知道嘅係WB及HBO正試圖將《Game of Thrones》世界搬上大銀幕。

《THR》指出此消息代表WB及HBO嘅策略改變。事關當年《Game of Thrones》劇集製作人David Benioff及Dan Weiss其實想以三部電影取代最後一季為劇集作結，George R.R. Martin亦支持呢個提案，但最終因為HBO強烈反對而未能成事，亦可能係造成最後一季變得奇奇怪怪嘅原因之一。

但近年WB及HBO（MAX）都嚐到電影與劇集聯乘嘅好處，例如電影《Batman》嘅衍生劇《The Penguin》口碑不錯、《Dune》亦將會有衍生劇集《Dune: Prophecy》、《Harry Potter》會拍劇集版、就連《Lord of The Ring》經歷衍生劇《The Rings of Power》第一季口碑爆死之後，都有意重啟電影版。換言之一個IP屬於「電影」或「電視」世界嘅界線越黎越模糊，WB及HBO有意將《Game of Thrones》搬上大銀幕亦唔出奇。

另一邊廂，George R.R. Martin近日於其博落格上撰文，透露當年HBO其實有考慮過以小說及劇集中都有出現嘅港口城市「Braavos」為主題開發一部衍生劇（Braavos是位於Essos大陸嘅港口城市，亦是Iron Bank所在地。劇集中Arya曾逃亡至此並學習The Faceless Man的暗殺技巧），但最終沒有繼續開發。不過George R.R. Martin指自己對呢個故事念念不忘，所以希望將來能夠將其寫成小說——前題係，先將大家期待已久嘅小說第六集《The Winds of Winter》寫好。換言之未來大家或者會睇到更多《Game of Thrones》衍生小說

不過對一眾書迷黎講，最重要嘅其實係George R.R. Martin都知自己嘅首要任務係寫好《The Winds of Winter》，畢竟上一本小說已經係2011年時推出，而George R.R. Martin今年已經76歲啦嘛。