2016年開播嘅Netflix「神劇」之一《Stranger Things》終於公佈最後一季（第五季）嘅開播時間。據日前公佈嘅標題預告，《Stranger Things》第五季將會於2025年開播，介時觀眾就可以與主角一行人再次回到80年代，進行最後一次冒險。

《Stranger Things》官方YouTube於日前公佈第五季嘅「標題預告」，簡單黎講就即係話畀大家知會播、同幾時播。當中冇公開任何劇集畫面或角色造型，但比較有趣嘅係預告中公開咗第五季嘅八集標題，分別為「The Crawl」、「The Vanishing of _____」、「The Turnbow Trap」、「Sorcerer」、「Shock Jock」、「Escape From Camazotz」、「The Bridge」及「The Rightside up」。當中第二集嘅標題「The Vanishing of ____」目前未知真係一個空白，定只係為咗避免劇透而刻意隱去句子主體，但就似乎代表某個重要角色或地方將會消失？

「標題預告」中另一重大情報，就係講明第五季故事將會發生於1987年秋天，與上季設定於1986年3月相距年半左右。基本上亦與劇集製作人Duffer兄弟過去多次強調劇集會停留於80年代相符。同時亦表示雖然劇集經歷2023年荷里活大罷工，延後到今年初先開拍，好可能係近期先煞科，但依然冇影響Duffer兄分原本嘅設定。