雖然年初上映嘅《機動戰士高達SEED FREEDOM》劇場版電影口碑好壞參半，但日本本土50億嘅票房就證明《SEED》呢個IP仲有大量價值可以榨取。所以除咗公佈未來仲會有《SEED FREEDOM》嘅前日譚新動畫電影《SEED FREEDOM ZERO》之外，《SEED FREEDOM》嘅週邊當然亦會繼續推出。例如「眼鏡廠」BANPRESTO早前就公佈一系列《SEED FREEDOM》週邊》，當中就以以下要介紹呢個「突擊自由高達極頭像喇叭」最為搶眼！

所謂嘅「突擊自由高達極 ZGMF/A-262PD-P」，其實係《SEED FREEDOM》最後，由基拉．大和駕駛嘅突擊自由高達貳式、與莉古絲駕駛「自豪防衛者」合體而成嘅劇場版新機體。與大家熟悉嘅突擊自由高達相比，外觀上最大嘅分別，就係後面對翼由藍、黑色變成白、金色，另外額頭位置藏有「收束重核子光束砲」。而BANPRESTO推出嘅「突擊自由高達極頭像喇叭」，顧名思義就係一個約11cm高嘅突擊自由高達極頭像，除咗還原機體設定、額頭仲可以打開露出「收束重核子光束砲」。如果要將佢作為喇叭使用，就先將頭部兩側嘅揚聲器打開。

九月時公佈嘅圖片

命運高達SpecII版本

整體而言，驟眼睇落係一件唔錯嘅擺設，但仔細睇就會發現佢非常「膠」，甚至單睇揚聲器部份嘅外觀，都可以想像到音質應該相當麻麻。不過據知呢個頭像喇叭係作為夾公仔機嘅獎品出現，咁呢個質素似乎又相當符合產品定位。順帶一提，9月時BANPRESTO曾公佈未來會推出嘅《SEED FREEDOM》嘅週邊，當時除咗「突擊自由高達極」之外，亦會推出「命運高達SpecII」頭像喇叭。

「突擊自由高達極頭像喇叭」預計11月12日後陸續登陸BANPRETO旗下嘅日本夾公仔機，大家年尾去日本旅行的話或者可以碰碰運氣。

資料來源：BANPRESTO