Pokémon卡手機遊戲《Pokémon TCG Pocket》自上月底推出後大受歡迎，唔少玩家為得到心儀卡牌研究出各種「玄學」，例如邊角彎曲嘅卡包、快速切開卡包容易抽出稀有卡牌，亦有人索性大手課金，課到抽到想要嘅卡牌為止。最近有調查機構統計，截止目前遊戲營收已超過1.2億美元，唔知你有冇份貢獻呢？

據市場調查機構AppMagic數據顯示，《Pokémon TCG Pocket》在10月30日於全球多地正式上線後，短短19日已大收1.208億美元（截至11月17日），相當於每日平均收入約640萬美元，其中又以日本玩家貢獻最多，佔全球營收42%，其次係美國，佔28%。反映出Pokémon呢個IP嘅超強吸金力。

目前官方將在今年底追加新嘅擴充包，而卡牌交換功能亦會在明年1月正式上線，唔知呢股熱潮可以延續幾耐呢？