在2000年代紅極一時嘅家庭喜劇《Meet The Parents（非常外父）》系列，事隔十多年後再傳籌拍續集，Robert De Niro、Ben Stiller、Teri Polo等主演亦有望回歸。但經過咗咁多年，我諗Ben Stiller今次直頭可以扮演外父了。

據外媒《Deadline》獨家報導，環球影業正在籌拍《Meet The Parents》第四集，前三集編劇John Hamburg確定再度執筆劇本，而Robert De Niro、Ben Stiller、Teri Polo、Blythe Danner等固定班底亦正在洽談回歸出演，至於導演人選仍在物色當中。

《Meet the Parents》故事講述由Ben Stiller飾演嘅男護士Greg同女友Pam相戀多年，並計劃向對方求婚，但意外得知原來要氹掂未來外父才能成事。於是Greg藉著參加Pam妹妹婚禮之際，順便拜會一下呢位未來外父大人。不過事情並無想像中順利，曾擔任美國中情局測謊專家嘅外父對Greg處處刁難，而Greg又為咗得到外父認可，搞出一連串尷尬笑料。

電影首集於2000年上映，以5500萬美元成本斬獲3.3億美元票房，同時亦係Robert De Niro轉型喜劇成功之作，其後亦分別在2004年及2010年推出過續集，全系列三集總票房超過11.3億美元。