自從Christopher Nolan宣佈正在籌備新作，而且演員陣容更係Matt Damon、Anne Hathaway、Tom Holland、Zendaya以及Robert  Pattinson等眾星雲集之後，大家就非常期待呢位應屆金像獎最佳導演會為大家講述一個點樣嘅故事。而係大量傳聞之後，近日Universal就官宣Nolan新作會係希臘史詩《奧德賽》，繼續用IMAX規格拍攝，預計2026年7月上映。

有關Nolan新作故事嘅傳聞一直滿天飛，「侯選者」包括「重拍或改編1967年英國特工劇集《The Prisoner》」、「設定於1920年代嘅吸血鬼電影」，以及「與1983年電影《Blue Thunder》非常相似嘅直升機主題電影」等。不過據Universal早日公佈，Nolan新作名為《奧德賽（The Odyssey)》，而且單從佢哋將電影形容為「神話動作史詩」，就可以知道電影唔係用咗個名咁簡單，而係真係改編自荷馬史詩《奧德賽》。換言之Nolan拍過超級英雄、入過夢境、上過太空、倒轉時空再整完核彈之後嘅新挑戰，係希臘古裝片。

Christopher Nolan與Matt Damon

雖然《奧德賽》並非新鮮主題，但外媒依然對Nolan新作充滿期待。Nolan過去嘅往績固然係原因之一，但更重要嘅係佢哋認為Nolan嘅號召力及調度能力，將係於大銀幕呈現《奧德賽》中宏大史詩場面嘅最佳人選。

《奧德賽》為荷馬所著嘅古希臘史詩之一，故事延續另一史詩《伊里亞德》（即係特洛伊戰爭），講述戰爭英雄奧德修斯於大戰後經歷十年嘅重重困難回家，同時喺家鄉嘅妻子佩涅羅珀被眾多求婚者煩擾，所以兒子鐵拉馬庫斯於雅典娜指引下出外尋父，最終父子二人合力解決事件一家團聚嘅故事。照咁睇，Matt Damon可能係奧德修斯、Tom Holland就有可能係鐵拉馬庫斯、妻子佩涅羅珀如無意外係Anne Hathaway，而Zendaya就有可能係雅典娜。

資料來源：Screenrant