耗資近2.2億美元製作嘅DC大片《The Flash（閃電俠）》，在2023年上映後雖然口碑不俗，但票房僅收2.71億美元，扣除戲院分成及宣傳費後，最終大蝕收場。最近導演Andy Muschietti提起呢部作品時，佢就認為票房慘敗原因在於閃電俠呢個角色缺乏人氣，以及未能吸引女性觀眾入場。

最近導演Andy Muschietti接受《Radio TU》訪問，談到《The Flash》為何會大蝕收場時，佢認為除咗主演Ezra Miller醜聞纏身與「超級英雄疲勞」現象外，另一個原因就係電影未能吸引全方位觀眾，甚至好多人都唔在乎閃電俠呢個角色：「當你花費2億美元拍攝一部電影時，華納兄弟會希望連你阿嫲會入場觀看。但我私底下同人傾計時發現，好多人都唔在乎閃電俠呢個角色，尤其係女性觀眾嘅兩個象限（即25歲以下及25歲以上嘅女性），呢一切都係對電影不利嘅因素。」

*荷里活片商普遍會將觀眾群分為4個象限，分別為「25歲以下男性」、「25歲以上男性」、「25歲以下女性」以及「25歲以上女性」，若然可以吸引晒4個象限嘅觀眾，票房自然唔會差得去邊。

CW頻道劇集版《The Flash》由Grant Gustin主演

對於呢番言論，唔少影迷都認為Andy Muschietti忽略咗CW頻道本身有一套由Grant Gustin主演、備受好評嘅同名劇集，並且足足拍咗9季，所以閃電俠呢個角色絕對唔係佢所講嘅無人在乎。事實上，當年Ezra Miller在DCEU初登場時，就經常被人拎嚟同Grant Gustin版本嘅閃電俠作比較，甚至跑步姿勢都成為挑剔嘅重點。

除此之外，《The Flash》慘敗嘅原因眾多，其中包括DCEU嗰期接連推出了《Black Adam（黑亞當）》、《Shazam! Fury of the Gods（沙贊2）》等口碑不佳嘅作品，令人對DCEU嘅出品失去興趣，以及電影特效備受批評等等。唔知大家又覺得《The Flash》點解會失利呢？