相信大家都一定有玩過扭計骰 (Rubik's Cube)，呢個立方體智力玩具自1980年問世以嚟就難倒唔少人。最近日本模型玩具公司MegaHouse就忽發奇想，將經典3x3扭計骰同錢罌合二為一，想拎返啲錢就要扭到六面同色先開到鎖！

呢款錢罌設計跟足經典3x3扭計骰，不過尺寸更加巨型，每邊尺寸放大至100mm（原版57mm），藍色面中間個格就係入錢口，而綠色面中間個格就係錢罌開口，最大存放量為一百個500日圓硬幣。考慮到港幣1蚊銀同500日圓硬幣差唔多大細，所以呢個錢罌應該都放得入1蚊雞嘅，但大少少嘅硬幣就唔清楚喇。至於唔識玩嘅朋友亦都唔使驚，事關盒內會附送埋解謎指南，跟住教學扭就可以回到原狀。

唔知大家又有冇興趣用4180yen（約HK$210）買返嚟玩下，又或者送畀朋友呢？