任天堂預計在4月2日公布新世代主機Switch 2更多消息，全球機迷引頸以待。雖然官方仲未正式公佈定價，但最近加拿大Costco就疑似有員工流出價格標籤，暗示新機在加拿大可能會以499.99加元發售（約HK$2,724）。

據外媒《NintendoWire》報導，一位Costco員工近日在「Famiboards」論壇上，貼出一張疑似係Switch 2嘅價格標籤「Nintendo Switch Place Holder」，外媒猜測當中嘅「Place Holder」應該係串錯字，實際應為「Palce Holder」，顯示新機售為499.99加元（約HK$2,724），遠低於各大外媒先前預測嘅399美元（約HK$3,100）。作為參考，初代Switch在加拿大售價為399加元，而OLED款則為450加元。若然消息屬實，意味性能更強大Switch 2只係貴初代100加元（約HK$545），價格相當親民。

從任天堂上月發布嘅宣傳片可以見到，Switch 2機身及螢幕尺寸明顯大咗個碼，機身頂部除咗保留電源鍵、耳機孔、遊戲卡槽之外，仲加入一個全新USB-C接口，而Joy-Con連接方式亦從滑軌改成磁吸式。至於大家最關心嘅性能提升，有傳Switch 2將配備NVIDIA Tegra T239晶片，CPU效能比初代提升2-3倍，GPU效能更提升7倍以上，並有望支援DLSS 超解析度、光線追蹤等技術，但實情如何仍有待官方在4月2日揭曉。