作為日本推理漫畫兩大山脈之一，《金田一少年事件簿》自1992年起開始連載，至今已經33年，期間漫畫亦經歷多個「季度」，而且金田一嘅身份亦隨時間有變。而繼去年完結嘅《金田一37歲事件簿》中嘅「中年社畜」之後，喺今年1月開始嘅新連載中，金田一就晉身爸爸，同美雪有個叫「九十九」、讀緊小學一年級嘅仔，而新作名稱亦叫做《金田一爸爸事件簿》！

其實於《金田一37歲事件簿》嘅最後，因為做空姐飛黎飛去一直只聞其聲不見其人嘅美雪終於出現，並宣佈自己懷孕、金田一即將要做爸爸。而考慮到美雪賺嘅錢比自己多，所以金田一決定辭去剛剛升任為課長嘅工作，改做「家庭主夫」，同時開設自己嘅偵探事務所。

而新作《金田一爸爸事件簿》就係延續呢個設定，不過時間再往前七年，金田一同美雪個仔「九十九」已經讀緊小學一年班——換言之金田一同美雪已經四十四、五歲——而金田一則一邊經營自己間噏耷偵探社、一邊照顧九十九嘅起居飲食。

金田一九十九

事目前於講談社網站上免費更新嘅首兩話，除咗交待故事背景，以及展現「九十九」都有唔錯嘅推理能力之外，最重要嘅就係開始查案。話說金田一接到一個用AI聲音講嘢嘅電話，揚言要出100萬Yen要求金田一幫佢尋找「某件東西」。而因為急住要錢交租，所以金田一就決定帶埋「九十九」去到一棟廢棄建築，隨後更遇上另外四個同樣接到委託嘅偵探。

值得一提嘅係，《金田一爸爸事件簿》冇因為「九十九」嘅出現而變得「闔家歡化」，一樣都係以謀殺案為主——真係唔敢想像對九十九嘅成長有咩影響呀。

資料來源：comic-days.com