由《上流寄生族》導演奉俊昊操刀，「蝙蝠俠」Robert Pattinson主演嘅科幻電影《Mickey 17》，日前在德國柏林舉行全球首映禮，首批影評隨之出爐！大多影評人及外媒都給予正面評價，更大讚該作係奉俊昊執導生涯最好嘅英語電影，預計今年3月6日於香港正式上映。

《Mickey 17》改編自美國作家Edward Ashton筆下科幻小說《Mickey 7》，講述複製人Mickey跟隨人類前往冰天雪地殖民星Niflheim，負責執行各式各樣嘅危險任務，每當一位Mickey犧牲後，記憶會被完整保留並移植到下一任Mickey身上，但在某次任務中發生意外，導致Mickey 17號被誤判為死亡，而公司亦好快就「列印」咗Mickey 18號出嚟，結果Mickey 17號返到基地後就見到有兩個自己，繼而引起各種問題。事關殖民地有規定如果出現「多重體」，就要將所有個體摧毀。

隨住電影首映禮落幕，影評網站Rotten Tomatoes分數亦正式解禁，在28篇評論中，目前電影共獲得86%新鮮度。以下為部份知名傳媒評價：

《Independent (UK)》：「呢部作品係Robert Pattinson最出色演出，佢收埋晒啲明星光環，轉而追求各種令人討喜嘅騎呢角色。佢喺呢部作品中徹底解放自我，以出人意表又有趣嘅方式演繹台詞。」

《Vulture》：「電影展示了科幻電影中，最底層嘅茄喱啡角色亦能為自己挺身而出，電影結局比奉俊昊其他作品更加有希望。呢種正能量甚至我哋當下呢刻都未必受得起。」

《The Hollywood Reporter》：「Robert Pattinson一人分飾兩角嘅表現，令到呢部英語電影足夠有趣，不過諷刺力度顯得有得過分。」

《Variety》：「呢種調性並唔係奉俊昊最拿手嘅路線，雖然電影怪奇嘅地方贏得唔少分數，但太多內容顯得過程草率、尖酸及說教。」

《indieWire》：「我認為《Mickey 17》係奉俊昊最優秀、最有有凝聚力嘅英語電影，並充分證明咗奉俊昊嘅天賦，呢部電影畀人嘅感覺係融合咗佢之前兩部作品《Snowpiercer》及《Okja》。」

《TheWrap》：「由偶像派轉型做文藝片寵兒，再到擔正動作片，原來Robert Pattinson可以輕鬆駕駛喜劇。佢喺電影入面展示出嘅肢體表演，直逼顛峰時期嘅Jim Carrey 。」