各位HBO劇迷如果目前追緊《The White Lotus（白蓮會）》第三季嘅話，唔怕完咗之後就冇嘢睇。事關接住落嚟就有《The Last of Us（最後生還者）》第二季上場，唔知Joel嘅結局會否跟足遊戲原著呢？

改編自同名電玩遊戲嘅HBO人氣劇集《The Last of Us》，今日公開第二季角色全新海報，當中包括回歸演出嘅Joel（Pedro Pascal 飾）與Ellie（Bella Ramsey 飾），仲有今季新加入嘅重要角色Abby(Kaitlyn Dever 飾)。與此同時，官方亦正式確定第二季將於4月13日在HBO及MAX播出，總共有7集。

《The Last of Us》第二季改編自原作遊戲第二部，時間設定在第一季5年後，Joel與弟弟Tommy及Ellie定居在懷俄明州過住平靜嘅生活，但因為第一季結局喺火螢醫院發生嘅事，令Joel同Ellie嘅關係變緊張，而Abby嘅出現更深深影響了兩人嘅命運...（再講就劇透喇）。

順帶一提，劇集主創Craig Mazin早前透露，由於第二部遊戲太多嘢可以講，單靠第二季係講唔晒所有故事，所以如果繼續有人投資而觀眾又想睇，佢希望可以拍到第三甚至第四季。