「一二，一二，隻腳呀，X幾時郁到隻手呀？」呢句嘢，相信係唔少香港人都耳熟能詳。但其實想轉波真係唔一定要郁隻腳，甚至嚴格上黎講連「手」都唔使郁，淨係郁隻手指就夠——只要你有呢個日本金屬加工廠推出嘅「手指公波棍」就得啦！

話說日本金屬加工廠「Co-in」開咗個YouTube頻道「ushiwork」，主要就係用佢嘅專業技術以及專業器材，去整個無聊得黎又好鬼精美嘅金屬小玩意。而早前佢哋就仿傚曾經紅過嘅「Fidget Toys」，整咗個大概只有手指公大少嘅「波棍」出黎。呢個「手指公波棍」全體使用不鏽鋼製成，重近250g，而且轉波時手感紮實，同時又有非常清脆嘅聲響，睇落非常舒壓。

由於「手指公波棍」影片反映非常好，所以佢哋順應民意推出量產，並分有五前速、六前速等三款。雖然要賣8,800Yen（約HK$460），但到撰文之時已經全部賣哂！想買嘅你就要留意佢會唔會補貨啦。

另外大家亦可以去睇下「ushiwork」上嘅其他影片，欣賞下佢哋嘅金屬加工工藝以及創意，例如上面呢個「自製金屬Tenga」就充滿惡趣味。