繼去年嘅全彩「電波暴龍機」大賣後，BANDAI今次再度出擊，將《數碼暴龍02》嘅「D-3暴龍機」升級成全彩版，等各位大朋友可以用彩色畫面重溫童年經典。

呢款25周年全彩「D-3暴龍機」忠實還原2000年原版機身尺寸與設計，但就升級為彩色液晶螢幕、內置震動摩打及支援USB-C充電。同時收錄咗《數碼暴龍02》多個經典場景、進化動畫、配音，以及「ターゲット～赤い衝撃」在內嘅經典歌曲。（即係劉德華翻唱嗰首《為我鼓掌》）

玩家能夠在遊戲中扮演本宮大輔、一乘寺賢等六位被選中嘅細路，以V仔獸、迪路獸、巴達獸等數碼獸展開冒險，而且已成為中學生嘅初代主角八神太一亦會登場。目前呢款暴龍機已在日本Premium Bandai開放預購，「本宮大輔」及「一乘寺賢」配色版售價為11,000日圓（約HK$572），而豪華DX版就用上「機甲龍獸」配色，兼附送10款數碼裝甲模型同美術集等特典，索價16,500日圓（約HK$858），預計2025年7月出貨。