備受矚目嘅Disney最新電影真人版《白雪公主》開畫票房出爐！雖然北美票房可以用「慘淡」黎形容，仲創下Disney所有真人版電影中最差嘅開畫票房紀錄，但海外票房表現唔錯，令其全球票房達到8,700萬美金，算係符合預期——但唔代表佢有錢賺喎！

據《Box Mojo Office》嘅數據，真人版白雪公主於北美嘅開畫票房為4,300萬美金，比起2019年嘅真人版《小飛象》（Dumbo）更低。而海外開畫票房就係差唔多嘅，4,430萬美金，換言之全球開畫票房為8,700萬美金左右，稍遜於之前媒體樂觀估計嘅一億美金。

於傳聞成本高達2.5億美金左右，換言之票房好可能要到6、7億先打個平手嘅情況下，《白雪公主》開畫票房並不突出已經足以令一眾Haters彈冠相慶。例如美國喜劇男星Rob Schneider就於X上轉貼出某場《白雪公主》嘅售票情況，只見成個戲院只係賣出一張飛咁大吧，並留言指「衷心多謝Disney工作室一手終結荷里活嘅覺醒風潮」。

但值得一提嘅係，去年年尾上映嘅真「獅」版《獅子王：木法沙》（Mufasa：The Lion King）北美開畫票房其實更差，只係得3,500萬美金左右，但最終全球票房都有7.17億美金，估計唔使點蝕錢。所以《白雪公主》嘅最終票房或者都冇想像中咁差。

資料來源：Box Office Mojo