自2017年初代Switch問世後，一直有唔少Switch玩家反映，Joy-Con嘅搖桿（俗稱蘑菇掣）用耐咗就會出現「飄移」問題，令角色喺冇人操縱嘅情況下自動行走，造成極大困擾。正當玩家期待Switch 2會採用廣受好評嘅霍爾搖桿時，任天堂最近就親口打破呢個幻想，表明Joy-Con 2並無採用有關技術，會否飄移仍有待觀察。

據外媒《The Verge》報導，任天堂被多次追問Joy-Con 2相關技術後，終於喺日前接受《Nintendo Life》訪問時交出明確答覆：「Joy-Con 2唔係用霍爾效應搖桿，但我哋有重新設計過手掣，握感同操控體驗會更好。」不過就冇透露究竟用咗咩技術去避免或減少飄移問題，睇嚟想知道真相，可能要等到Switch 2正式開賣後，留待一眾硬體達人拆機研究。