繼《Barbie》真人版電影大賣後，著名連續玩具店「玩具反斗城」(Toys ‘R’ Us)亦宣布要推出真人版電影！據稱，電影劇本將會參考《翻生侏羅館》(Night at the Museum)系列，話唔定觀眾可以見到一眾經典玩具喺舖頭關門後變得「栩栩如生」，展開一場刺激又有趣嘅大冒險？！

據外媒《Variety》獨家報導，玩具反斗城將與《超音鼠大電影》系列製作公司Story Kitchen合作，將呢個擁有70多年歷史嘅連鎖玩具店品牌搬上大銀幕。雖然官方尚未公開劇情細節，但消息指電影將會從《翻生侏羅館》(Night at the Museum)、《回到未來》（Back to the Future）、《飛越未來》（Big）等冒險電影，以及《Barbie》、《逃出魔幻紀》（Jumanji）等玩具電影汲取靈感，並於未來幾個月內公布演員陣容。

對此，Story Kitchen聯合創辦人Dmitri M. Johnson與Mike Goldberg透過聲明表示：「作為80年代嘅細路，我哋覺得玩具反斗城係地球上最有魔法嘅地方，我哋好榮幸能夠參與製作呢部電影，展現出玩具反斗城所代表嘅冒險、創意同懷舊精神。」呢番話似乎暗示緊電影可能會以80年代、亦即係玩具反斗城最輝煌嘅時期為背景。當年正值《星球大戰》、《變形金剛》、《He-Man》、《Barbie》、《Care Bears》、《忍者龜》、《藍精靈》等過百個經典玩具品牌大熱。若然片商真係拎得到晒呢啲玩具嘅版權（雖然好似有啲難），相信無人係大人定小朋友都會有興趣入場支持。