由Rockstar開發嘅《GTA 6》自從2014年正式開始開發後，「幾時有得玩」一直都係全球玩家們期待以久嘅消息。而近日Rockstar就正式畀出一個確切日子，不過令大家稍為失望嘅係個日子開頭係「2026年」，換言之大家仲要等多一年。

Rockstar上週六於官方X發出公告，先係表示《GTA 6》嘅發售日將定於2026年5月26日，亦即大約一年之後；今次亦係Rockstar首次為《GTA 6》提出一個確實嘅發售日期。公告隨後表示對於遊戲發售日「比起玩家們預計稍遲感到抱歉」，並指出佢哋推出每一隻遊戲都係希望能突破玩家們嘅期待，所以需要更多時間去完善遊戲。

去年5月時，Rockstar母公司Take-Two Interactive於年度財政報告中表示，《GTA 6》將於「2025年秋天」發行，算係首次提供精確到「月」嘅發售日，同時亦代表最新公告其實係「延期發售通知」。不過對於熟悉Rockstar嘅玩家黎講，相信都習慣一日未見到隻Game實物都唔信佢真係上市。同時今次更準確嘅日子，亦令新發售日睇落更加可信。大家都等咗十幾年囉，唔差在嗰一年啦。