除咗舞蹈、音樂、建築、電影等「八大藝術」之外，近年一直有人認為「電子遊戲」有望成為第九大藝術（另一說法係漫畫），而近日大熱嘅《光與影：33號遠征隊》就可能係近年最接近「藝術」水平嘅遊戲之一。其中一個好例子，就係遊戲嘅同名原聲大碟近日竟然衝入著名嘅Billboard排行榜，仲一口氣拎咗兩個第一！

由法國工作室Sandfall Interactive開發嘅《光與影：33號遠征隊》（以下簡稱《33》）自4月尾開售以來，就以極高水平嘅美術風格、與別不同嘅回合戰機制，以及充滿深度嘅故事及演出成為玩家們嘅熱議之作，甚至被認為係今年年度遊戲嘅最有力爭奪者。而遊戲當中由Lorien Testardo創作、時而慷慨激昂、時而低柔婉轉，恰到好處地襯托故事嘅配樂亦深得玩家喜愛。Sandfall早前於官方YouTube發佈嘅主題曲《Lumière》現場演奏版更於5日內獲得近50萬次觀看，可見其受歡迎程度。

而《33》嘅官方原聲大碟亦似乎有「出圈」嘅跡象。《33》官方X日前發文，表示原聲大碟成功登上Billboard排行榜中嘅經典音樂大碟（Classical Album）以及經典跨界大碟（Classical Crossover Album）第一名，並同時闖入原聲大碟榜第13名、以及官方大碟下榜嘅31名。或者會進一步帶動遊戲熱度以及銷量。