憑藉迪士尼真人版《小魚仙》而聲名大噪嘅Halle Bailey，最近被爆遭Rapper前男友DDG多次身體及言語虐待，目前已報警並成功向法庭取得臨時禁制令。

今年25歲嘅Halle Bailey同27歲嘅DDG（全名Darryl Dwayne Granberry）喺2022年開始拍拖，並在2023年12月迎來兒子Halo Saint Granberry，直到去年10月宣布分手。然而，最近外媒《TMZ》取得一件法庭文件，顯示Halle Bailey因為在分手後遭到DDG多次虐待，所以報警求助並成功向法庭申請臨時禁制令。

據報導指，文件詳細列出多宗DDG嘅虐待事件，最早可以追溯到今年1月。當時DDG前往Halle住處接走兒子Halo，兩人商討探訪兒子時間表時發生口角。Halle喺汽車後座幫Halo扣安全帶嗰陣，DDG突然發火，反覆大叫：「躝出我架車，賤人。（Get out of my car, BITXH.）」，當堂嚇到Halo爆喊。跟住兩人開始扭打，Halle宣稱DDG扯住佢頭髮，將佢塊臉撞向軚盤，導致佢門牙崩裂、身體亦有多處瘀傷。由於佢好擔心兒子嘅安全，所以繼續留喺車內直到駛向DDG住所，仲同DDG家人講晒成件事，聽到對方表示會照顧好Halo後就「歇斯底里」咁離開。

除此之外，Halle亦宣稱在今年三月，佢同Halo因為生病唔想離開屋企，但DDG強行入屋，仲整爛咗佢嘅智能監控攝影機、攞走埋佢部電話。DDG揸車走嗰時，甚至將電話掟出窗外，向Halle大叫：「去執啦，賤人（GO GET IT BITXH.）」。呢件事最終令Halle忍無可忍決定報警，仲話監控攝影機有錄低整個過程。

據了解，洛杉磯高等法院已批咗Halle嘅禁制令申請，保護Halle以及2歲嘅Halo。法庭要求DDG無論何時都要同Halle及Halo保持超過100碼（約91米）距離，包括Halo嘅學校同Halle部車附近。

資料來源：TMZ、people