向來創意十足嘅日本日清，為咗令Fans可以食到完美嘅元祖雞汁即食麵加蛋，佢哋用咗整整一年時間研發，終於製作出一款「黃色小雞」造型嘅專用泡麵碗—「しろたまメイカー（白玉製造機）」。呢款神器可以保證蛋白熟透但蛋黃保持軟滑，輕鬆做出完美嘅しろたま（白玉）效果！

即食麵喺日本飲食文化具有獨特地位，唔單止方便、易整又抵食，仲有好多人係真心鍾意食即食麵，甚至會諗好多方法令到個麵更加好食。其中一個備受歡迎做法就係加入生雞蛋一齊煮，整出所謂嘅しろたま（白玉），即係蛋白熟透但蛋黃就係半生，用筷子一夾，蛋黃就會流出同湯底融合，令味道變得更加豐富。不過，要做出完美白玉效果並唔簡單，你要好小心咁將生蛋放喺麵餅上，仲要好技巧咁倒滾水，稍為唔小心就可能沖散蛋白，影響賣相同口感。為咗令各位Fans能夠做出完美嘅加蛋元祖雞汁即食麵，日本就花咗一年時間研究出一款專用泡麵碗「しろたまメイカー（白玉製造機）」。

泡麵碗以吉祥物「黃色小雞」為造型，主要由三個部件組成，底層係放麵餅嘅豌、中層係一個能夠將熱水均勻淋落蛋白嘅花灑頭，而頂層就係一個令蒸汽對流得更好嘅蓋。而使用方法亦非常簡單，只要將麵餅放入豌，並向麵餅凹陷處加入生蛋，然後就可能蓋上中層加入熱水，熱水會透過花灑頭精準淋喺蛋白部分，避開蛋黃。最後蓋上頂蓋等3分鐘就食得！官方表示，佢哋喺過去一年試驗咗12款唔同形狀嘅「花灑頭」，先至搵到最完美嘅設計，確保每次都能整出靚靚白玉蛋。

目前呢款泡麵碗只送不賣，限量1,000個。如果有興趣又身處於日本嘅朋友，只需要購買一條5包嘅日清元祖雞汁即食麵，並到指定網站上傳收據，就可以參加抽獎。第一輪由即日起至7月31號，第二輪由8月1號至9月31號，每輪抽出500個幸運兒。想知詳情可以去日清官方網站了解更多。