LEGO在年初宣布與Netflix真人版《ONE PIECE》合作後，雙方Fans都期待萬分。如今官方終於一口氣推出5款聯乘積木模型，重現「東海篇」多個著名場景。有梅利號，又有海上餐廳芭拉蒂，今次LEGO迷同ONE PIECE迷都準備銀包大出血喇！

75639 前進梅利號海賊船 

作為草帽海賊團首隻海賊船，梅利號陪伴路飛一行人走過前期多場重要冒險，更係路飛嘅重要夥伴。模型以1,376塊零件組成，完成組裝後長39cm、高34cm、寬20cm，忠實還原船員艙、廚房、儲藏室及工作間，並附上路飛、卓洛、娜美、烏索普以及山治五款Netflix版人偶。

75640 芭拉蒂海上餐廳

除咗梅利號，山治成長及學習廚藝嘅芭拉蒂海上餐廳亦有份！呢款模型由3,402塊零件組成，尺寸更加巨大，完成組裝後高35cm、長54cm，內部有多個房間，包括廚房與用餐區、哲普艙房及寶藏室，細節滿分！。仲附送10款人偶：路飛、卓洛、娜美、烏索普、山治、哲普、卡普、貝魯梅伯、克比及鷹眼，陣容相當豪華。

至於另外3款雖然係相對迷你嘅模型（1000塊零件以下），但同樣都係東海篇嘅經典場景，分別係「75636 風車村小屋」、「75637 小丑巴其的馬戲團帳篷」及「75638 惡龍樂園之戰」。

5款LEGO x《ONE PIECE》聯乘模型預計8月1日正式發售，其中前進梅利號由即日起至7月31接受預訂，參加預訂嘅朋友將獲得珍藏卡 及 專屬海報（數量有限，送完即止），有興趣嘅朋友切勿錯過。