{ SKIP }
文:MenClub 魏文青  
POSTED ON 02 Jul 2025

由George R.R. Martin創作嘅《A Song of Ice and Fire》(冰與火之歌)係過去30年中最著名嘅奇幻小說系列之一,其改編而成嘅HBO劇集《Game of Thrones》亦曾一度佔據「神劇」位置。不過其實原著小說自2011年推出第五部《A Dance with Dragons》(與龍共舞)之後就一直停更,第六部《The Winds of Winter》(寒冬冽風)寫咗十幾年未寫完。對此,另一著名奇幻小說系列《Witcher》作者Andrzej Sapkowski近日就於一個座談會上表示同情,並指出George R.R. Martin寫唔出新書嘅原因係因為HBO套劇。

Andrzej Sapkowski

卻說Andrzej Sapkowski早前出席波蘭Opole書節舉行嘅座談會時,喺無人問嘅情況下主動提到:「如果一陣有人準備問呢啲問題的話,我依家就答咗你先:我會繼續寫,放心,唔使驚。而唔似同我有啲交情嘅George R.R. Martin,當我話會寫,我就真係會寫。」

雖然驟眼睇Andrzej Sapkowski好似串緊George R.R. Martin,但隨即佢就表示理解點解對方一直未能完成《The Winds of Winter》:「如果有人將我嘅作品改編成影視作品,然後將個故事發展得比我寫嘅更快,我都會懷疑究竟仲有冇需要繼續寫落去,你都拍哂出黎啦我仲寫黎做咩啫?拎作品去改編唔係問題,呢個係作家嘅權利,但改到咁就有啲唔太好囉。」

George R.R. Martin

圖片:Wikicommon

隨後佢用一個小故事總結出佢對影視改編自己作品嘅睇法:「我曾經於捷克某個活動同Harry Harrison(美國科幻作家)傾過計。佢問我『有冇睇過套叫《人吃人》(Soylent Green)嘅戲?』我話有呀。然後佢又問『咁你知唔知套戲係改編自我本《Make Room! Make Room!》呀?』我緊係知啦,我有睇過小說嘛。『咁你覺得套戲點呀?』我話套戲非常垃圾,佢就話『我都覺得好垃圾呀』。然後我就問佢『咁你有冇退返啲錢畀人呀?』Harry Harrison話『冇』,我就話『咁呀,就唔好出聲啦。』」

然後Andrzej Sapkowski繼續說道:「所以Martin冇繼續寫落去,好可能係佢被劇集拍咗個結局出黎呢件事冒犯到。但我估佢都冇退返錢畀人啦,畀我我都唔會退。」

資料來源:Redanian Intelligence

繼《超級瑪利歐兄弟大電影》大獲成功及《薩爾達傳說》真人版電影計劃公開後,任天堂並無打算停低腳步,正準備將更多經典角色搬上大銀幕! 據外媒《IGN》報導,任天堂同環球影業最近為一部名為《Untitled Do ...
hobby
【影視】大金剛有望登陸大銀幕擔正主角?任天堂與環球影業註冊《Donkey Kong》電影項目
15 Jul 2025
《龍珠》嘅歷史悠久,代表相關嘅衍生作品,例如遊戲亦非常多。如果你一個Fans,或者會覺得要同時追N隻Game有啲麻煩,但有好多隻Game就同時亦代表有好多「週年紀念」及相關官方活動。好似近日《龍珠》嘅官方X繼今年2 ...
hobby
【動漫】龍珠手遊7週年 官方X抽悟空及菲利衣裝
15 Jul 2025