Skydance Media在上周正式以80億美元收購派拉蒙影業，最近新老闆David Ellison就率領一眾高層舉行記者招待會，分享一系列未來計劃，其中就提到開拍《壯志凌雲3（Top Gun 3）》將會係片廠嘅首要任務。

David Ellison在會上表示：「我哋嘅目要任務，就係將派拉蒙重成打造成全球頂尖藝術家同電影人嘅首選片廠。原因好簡單，偉大嘅電影人先能夠拍出偉大嘅電影！」而《壯志凌雲3（Top Gun 3）》係片廠最優先嘅項目，並表示只要Tom Cruise呢位一線巨星願意同佢繼續講故事，佢就會一直拍落去。順帶一提，Tom Cruise已經同David Ellison旗下嘅Skydance合作過10部電影。

《變形金剛：狂獸崛起》

除此之外，David Ellison仲計劃大幅增加電影量產，重新推動《星空奇遇記（Star Trek）》、《義勇群英（G.I. Joe）》、《未來戰士（Terminator）》與《變形金剛（Transformers）》等經典系列，仲有由Brad Pitt主演嘅2013年喪屍電影《地球末日戰（World War Z）》。與此同時，原創電影亦係一大重點，並指出Timothée Chalamet同名導James Mangold合作嘅越野電單車搶劫片《High Side》就係首個獲批嘅原創項目。

派拉蒙高層表示，現時公司計劃在明年發行8部電影，但呢個產量並唔足以支撐院線電影業務，所以佢哋打算將產量提升至每年15部，之後再增加至每年20部。多年來，派拉蒙一直飽受資金短缺困擾，而被荷里活唔少大牌電影人忽視，或者今次收購將會係一個好機會，能令呢間老牌片廠再創輝煌。