曾執導《哈利波特：神秘的魔法石》及《哈利波特：消失的密室》嘅Chris Columbus日前在Podcast節目《The Rest Is Entertainment》提到，當佢見到由Nick Frost飾演嘅新版海格，造型竟然同原版幾乎一樣，忍唔住質疑咁樣重拍有咩意義：「我睇到啲相，Nick Frost著嘅衫同我哋當年嘅設計一模一模。我不禁心諗：『咁有咩意義？』我本以為(HBO劇集版)嘅戲服同其他一切都會有所不同，但而家睇落去似乎同以前差唔多。不過，見到佢哋用返我哋當年為海格設計嘅造型，真係一大榮幸，所以我一方面非常興奮，想睇下劇集版會點樣演繹；另一方面又有種似曾相識嘅感覺。」

Chris Columbus曾執導首兩集《哈利波特》並在第三集擔任監製

話雖如此，但Chris Columbus並唔係反對或抱怨HBO重拍劇集版。佢早前接受《Variety》訪問時就提到，由於劇集版可以用一季時間改編一本書，能夠補充當年電影版因時間限制而刪減嘅內容，例如第一本書入面嘅角色Peeves：「當年我哋想將第一、二、三本書嘅所有內容都搬上大銀幕，但真係無時間塑造Peeves呢個角色。另外，仲有哈利同妙麗必須飲魔藥，並擔心自己可能會中毒嘅情節。」Chris Columbus認為，劇集版嘅好處就係有機會將呢啲場景呈現出嚟。

HBO劇集版海格由Nick Frost飾演

至於飾演新版海格嘅Nick Frost，佢早前提受《Collider》訪問時就提到，自己會尊重原版海格Robbie Coltrane嘅經典演出，但唔會完全模仿：「我唔會刻意做啲『另類』嘅事情，會喺尊重原著嘅基礎上，加入一啲細微嘅變化。我一直覺得海格係一個可愛、迷惘、帶點暴力、搞笑又溫暖嘅『大細路』。劇集一季改編一本書嘅模式，能夠畀我有更多空間去探索呢個角色，我非常期待！」

HBO劇集版《哈利波特》正如火如荼拍攝中，預計第一季將於2027年播出。究竟新版海格同電影版有咩唔同？各位Fans們拭目以待！