作為一個要經常於網上搜集資料嘅人黎講，Google推出AI總結（AI Overview, AIO）功能後的確幫手慳咗好多時間。但另一方面，當用家於搜尋頁面上就得到所有資訊，就代表佢哋唔需要點擊連結進入網站，網站失去流量自然就失去廣告收入，結果就無法經營。近日有多間媒體公司就指出AI總結功能令旗下網站流量大跌，最高甚至跌89%；另一方面，Google一邊強調AI總結功能唔會殺死Open Web，另一方面則於法庭文件中指Open Web「急速衰退」。

圖片：ImageFX

據《BBC》引述擁有《Daily Mail》、《Metro》、《iNews》等多間英國媒體嘅DMG Media表示，自從AIO出現之後，其網站點擊量就大減89%；而擁有《Daily Mirror》嘅Reach plc嘅出品人David Higgerson亦表示過去媒體業者製作準確、可信、跟上時事嘅內容，以充當Google搜尋嘅燃料，換取一個可能會變現嘅點擊。但當AIO出現之後，用家根本就唔需要點入網站，換言之媒體業者辛苦一輪最後咩都拎唔到。德國Bauer Media則表示，雖然目前佢哋嘅點擊率無明顯變化，但當越黎越多人習慣使用AIO或類似功能時，情況就一定有變化。

網站點擊率下跌就代表廣告收入變少，咁留畀媒體業者嘅其實只有兩條路，一就係乾脆摺埋唔做，另一就係改成付費訂閱制，換言之用家需要畀錢先可以睇到相應內容（AI當然亦無法使用其內容）。但問題係呢兩條路都會影響Open Web嘅生態——網上內容唔再係人人平等可得。

Google掌握全球90%以上嘅網上搜尋，媒體業界自然就期望佢哋能諗出一個至少係雙贏嘅解決辦法。而Google過去就多次指出，AIO等功能唔會殺死Open Web，反而會令其更加壯大。好似Google資訊與知識高級副總裁Nick Fox早前接受Podcast訪問時，就指出即使撇除垃圾內容，網上嘅整體內容量仍然增加45%，並指出喺佢哋嘅角度，人們仍然會主動點擊連結。

不過有媒體發現Google於法庭文件中有另一個說法。話說Google即將面臨壟斷廣告科技嘅指控，萬一最終指控成立，其廣告部門可能要分拆出黎成立新公司。Google當然就唔會想咁做，於是喺法庭文件中，佢哋就話「事實上，當今開放網路已呈現急速衰退之勢，拆分方案只會加速此衰退，損害目前依賴OpenWeb展示廣告收入的出版商」。誠然考慮到案件性質，Google「自污」似乎係情有可原，而佢哋回應《The Verge》查詢亦指文中嘅「衰退」係指「Open Web廣告」而非「Open Web」本身，佢哋呢個說法似乎亦於媒體業者嘅反應不謀而合。

資料來源：BBC、The Verge