中國近年流行嘅「短劇」，每集僅一至三分鐘，一套戲閒閒地過千集，而且劇情唔係「霸道總裁」就係「狗血爭產」之類嘅老土題材。但你唔好以為「短劇」只係得班阿叔阿嬸睇嘅偏門類型呀！根據Media Partners Asia (MPA) 嘅最新報告，今年中國短劇嘅收入可能高達94億美金（約HK$730億），比起傳統電影嘅年度總票房更高，換言之以經濟體量黎計，短劇先係主流呀！

短劇 (Micro-Dram) 於近年可謂急速冒起。據MPA最新發表嘅「短劇經濟 2025」研究報告，中國短劇收入於2021年只有約5億（美金，下同），但到去年就已經暴升至70億，今年預計會達到94億，2030更會達到162億，年增長率達11.5%。報告指目前中國短劇市場有三大平台，分別為字節跳動旗下嘅「紅果」、騰訊旗下嘅「微訊視頻號」、以及快手旗下嘅「喜番」。三者都有各自己嘅社交及付費生態，但由不約而同地於「蕃茄小說」等網站搜羅適合作品改篇成短劇。同時整個產業鍊各個地方都大量應用AI，以進一步壓縮成本。

而且你唔好以為只有中國人睇短劇呀！報告指出以美國為首嘅海外市場增長幅度就更加快。2024年嘅海外短劇市場約為14億，但到2030年就會激增至95億，年增長率達28.4%。美國短劇市場主要由DramaBox及 ReelShort 兩大平台主導，觀眾以30至60歲嘅富裕都市女性為主，最受歡迎嘅係浪漫、霸道總裁或者復仇向劇集。而日本、東南亞以及拉丁美州等地區亦同樣係新興短劇市場。

MPA行政總裁Vivek Couto於報告中指出，短劇已經成為價值數十億美金嘅全球類別，劇集本身嘅製作成本低，但發行成本卻非常高。所以成功嘅要訣在於更新速度、規模，以及搵到可以重覆使用嘅IP——簡單黎講就即係同間工廠一樣，不停「啤」大同小異嘅內容出黎餵飽觀眾就得。

資料來源：Deadline