年初時我哋介紹過日本著名玩具店「豆魚雷（Mamegyorai）」旗下有「TorchTorch」品牌推出嘅《Elden Ring》暗月戒指，而最近佢哋又推出《Elden Ring》相關嘅新週邊，分別係「碎星的傳說」以及「觀星少女的傳說」吊墜。對於《Elden Ring》Fans，又或者覺得自己需要加啲力量或智力嘅人黎講應該相當吸引。

「碎星的傳說」吊墜

兩款吊墜都係由日本雕刻家加角色設計師「大畠雅人」根據遊戲內兩款護符而製作。遊戲中能為玩家角色加5點力量嘅「碎星的傳說」上有Boss「碎星拉塔恩」拎住雙刀嘅輪廓，而能加5點智力嘅「觀星少女的傳說」上就有……一個觀星少女。兩個吊墜均以黃銅製作，並以打磨及煙燻加工造舊。對角大小為26mm，鍊長55cm。

包裝盒上有《Elden Ring》及TorchTorch嘅燙金字樣，內部則有遊戲中嘅「賜福」燙金圖案。

「觀星少女的傳說」吊墜

要增加力量及智力當然有代價，而且仲唔平。上述兩款吊墜售價為14,850Yen，即約HK$780。而且目前只係接受預訂，最快明年3月先出貨。另外提提大家TorchTorch嘅官網似乎有限海外IP，如果想去官網購買的話，就要用自己嘅方法改IP啦。

資料來源：TorchTorch