小島秀夫及其工作室為Microsoft Xbox平台開發嘅恐怖遊戲《OD》，於上週公開首條預告。雖然目前唔知隻會唔會如《Death Stranding》咁再次創出佳績，但條預告片就可能創下一個遊戲界前無古人嘅先例——據小島秀夫講，條預告片真係錄到「鬼聲」！仲搞到佢拉埋Microsoft嘅人一齊去拜神求平安。

《OD》預告片中，會見到由Sophia Lillis飾演嘅角色於一個陰暗嘅房間中，用火柴點著數支形狀怪異嘅蠟燭，似乎係進行緊某個儀式。期間不停出現貓叫、敲門聲、開門聲等驚嚇效果。大家都知小島秀夫鍾意用3D掃瞄真人演員、真實環境，但遊戲始終會進行修改嘛，所以有「鬼」嘅部份不在於大家睇到啲咩，亦唔再於上面提到，非常明確嘅音效，而係在於背景中偶爾出現（如1:48、以及2:15秒後）出現嘅「劈劈啪啪」聲。

據小島秀夫接受《Gamesradar》訪問時提到，呢啲「劈劈啪啪」聲唔係佢哋後期加入去，而係於工作室錄音時直接錄到。「可能當時真係有鬼喺附近，但依家已經唔喺到」。佢亦表示事後拉埋Microsoft嘅人一齊去神社參拜，祈求可以順利完成隻Game。

而且你唔好以為小島秀夫怕鬼呀！同一個訪問中，佢就提到宣傳片中嘅場景，係現實存在嘅鬧鬼地方，而小島及團隊真係去到現場掃瞄整個環境再放入隻Game入面。而佢未來嘅目標係「為咗《OD》，希望可以去世界各地嘅鬧鬼地方。我希望可以做第一次掃到鬼嘅人，最好仲拎埋獎添！」

目前唔知小島秀夫掃到鬼未，但起碼錄到鬼聲，都算係開咗個好頭啦？

資料來源：Gamesradar