雖然Vin Diesel早前曾表示《狂野時速（Fast & Furious）》系列最終章《狂野時速11》將於2027年4月正式上映，仲話要令Brian O'Conner「回歸」同唐老大重逢，但實際進展似乎唔太樂觀！據知情人士透露，目前劇本尚未定定稿、演員亦未簽約，另外又因為製作成本太高，片商環球影業要求劇組大幅削減預算，否則就唔批准開拍。

據外媒《華爾街日報》報導，目前《狂野時速11》製作成本大約為2.5億美元，但片商希望將今集預算控制在2億美元左右，相當於要削減20%。其中又以演員片酬佔得最多，消息人士指，Vin Diesel片酬要價2,500萬美元，而其他配角片酬亦介乎於200萬至1000萬美元之間。為咗控制成本，製作團隊現正考慮減少橫跨多國取景，同埋刪減某啲演員嘅戲份。

環球影業之所以有呢個要求，主要係因為上集《狂野時速10》遇上疫情及罷工潮，導致製作成本高達3.4億美元，但全球票房卻只收得7億美元。而且考慮到呢個IP已經運作超過20年，人氣已大不如前，所以更需要注重成本控制。除此之外，消息亦提到環球正研究用更低嘅成本，製作真人版劇集或部份角色嘅外傳電影，期望可以重新激起新一代對該系列嘅興趣，令《狂野時速》系列得以延續。