據外媒《Game File》爆料，Ubisoft原本正開發一款以美國南北戰爭及重建時期為背景嘅《刺客教條》新作，講述「黑人奴隸」主角成為刺客對抗3K黨，但因為擔心重蹈《刺客教條：暗影者》「彌助」嘅爭議，加上美國政治氣氛日益緊張，最終決定取消製作。

《Game File》引述五位現任同前Ubisoft員工消息，呢款遊戲講述講述一名曾在南方淪為奴隸嘅黑人，移居到西部展開新生活後，被刺客兄弟會招募，重返南方為正義而戰，包括對抗當時新興嘅白人至上主義組織3K黨。

消息指，開發人員都對呢款遊戲「充滿熱情」，甚至覺得可以為社會帶嚟正面影響，所以對遊戲被取消感到非常沮喪，認為公司係向爭議屈服。雖然Ubisoft領導層起初批准開發，但後覺得題材太敏感，尤其係而家美國政治氣氛緊張，加上2024年春季推出嘅《刺客教條：暗影者》引起大量反對聲浪，Ubisoft巴黎總部高層最終在去年7月正式叫停項目開發。