近日遊戲界中最重要嘅新聞，當然就係《GTA 6》宣佈再度延期，要到明年11月19日先正式發售。而且呢個消息唔單止成為遊戲界新聞，近日甚至成為埋國際政治新聞，事關波蘭有個議員竟然於國會上「批評」《GTA 6》再度延期，甚至公開「呼籲」民眾上街抗議。

話說上個星期Rockstar宣佈《GTA 6》再度延期後無耐，波蘭國會會議上就有一名反對派「自由與獨立聯盟」嘅議員「Witold Tumanowicz」於國會發言中提及相關消息。佢話：「作為我發言嘅一部份，我想通知大家一個非常令人不安嘅消息：一個鐘頭前，Rockstar Games宣佈《GTA 6》會延期到明年先發售。呢個係極大嘅醜聞。老實講，如果發生咗啲咁嘅事大家都唔上街抗議，我都唔知會發生咩事。」

而來自波蘭右翼黨派「法律與公正黨」嘅另一位議員「Paweł Szrot」亦支持Witold：「我尊重佢嘅發言。我亦希望《Bannerlord》（另一隻中世紀RPG遊戲）嘅更新唔會再延期。」

兩位波蘭議員嘅發言固然係以搞笑居多，唔太可能會有咩實質結果，不過某程度上亦算係反映出《GTA 6》嘅全球影響力。另一邊廂，波蘭網民就對兩位嘅發言大加讚揚，甚至有人表示「國會終於講啲有用嘅嘢啦！」

資料來源：Euronews、Reddit