由FX電視台製作嘅異形前傳劇集《Alien: Earth（異形：地球）》自今年8月開播後反應熱烈，首周就錄得超過920萬次觀看，並獲得評論界一致讚好（但觀眾口碑參半）。有見此及，迪士尼及FX電視台正式宣布續訂第二季！

根據外媒《Variety》報導，FX同迪士尼娛樂電視部門唔單止落實續訂《Alien: Earth》第 2 季，仲同劇集主創兼導演Noah Hawley簽下價值高達九位數美元嘅長期合作合作，等佢繼續為 FX開發多個新項目。除此之外，第二季拍攝地點亦會由首季嘅泰國移師倫敦，預計明年正式開拍。呢個改動莫非係代表第二季劇情舞台將離開 Prodigy 總部「Neverland（夢幻島）」？

《Alien: Earth》背景設定在《Alien: Covenant（異形：聖約）》16年後、首集《異形》2年之前嘅2120年。當時地球分別由Prodigy、Weyland-Yutani、Lynch、Dynamic及Threshold五大企業統治。除咗普通人類，地球上仲有「改造人 」（cyborg，擁有人造部件嘅人類）、「合成人」（synthetic，具有人工智能嘅人型機械人）以及由Prodigy最新研發嘅「混種機械人」（hybrid，植入人類意識嘅人型機械人）。故事講述一艘屬於Weyland-Yutani嘅神秘太空船墜毀喺Prodigy所屬城市，當Prodigy派出混種機械人前往調查殘骸時，竟發現船上載有五種恐怖外星生物；與此同時，Weyland-Yutani亦暗中出手，企圖奪回船上嘅生命體...

Noah Hawley

Noah Hawley自2014年起同FX合作，創作出大受好評嘅黑色犯罪詩選劇《Fargo（雪花高離奇命案）》，至今已播出五季，共奪得7項艾美獎及3項金球獎。另外，佢亦係FX同Marvel聯乘劇《Legion（潛能異士）》嘅主創，該劇共播出三季，口碑同樣極佳。