早前有消息指擁有50年歷史嘅日本經典特攝《超級戰隊》系列將於今季正式落幕，令唔少特攝迷大感可惜。但正所謂舊嘅唔去，新嘅唔嚟！日本東映同朝日電視台今日正式公布全新特攝企劃「PROJECT R.E.D.」，宣布將打造一個以「紅色英雄」為核心嘅全新特攝系列，而首部作品《超宇宙刑事 Gavan Infinity（超宇宙刑事ギャバン インフィニティ）》將會於2026年正式亮相，並接替《超級戰隊》原本嘅播放時段。

1982年特攝劇《宇宙刑事Gavan》

據官方介紹，《超宇宙刑事 Gavan Infinity》靈感源自1982年經典特攝劇《宇宙刑事 Gavan（中譯：宇宙刑事卡邦）》。當年作品以主角對抗宇宙犯罪組織、守護地球為主軸，而其金屬戰甲形像更震撼80年代觀眾，吸引日本以至海外Fans熱烈追捧，堪稱一代傳奇。今次新作雖然承繼咗經典嘅金屬英雄造型與科幻世界觀，但官方強調作品屬「完全重構」，將透過最新影像技術同現代製作手法，從零開始打造一個全新版本嘅 Gavan。

作為「PROJECT R.E.D.」企劃第一彈作品，Gavan Infinity將會身穿紅色金屬戰鬥裝甲登場。官方亦率先公開首張視覺圖大賣關子，仲話等到完整造型曝光後，相信Fans們會更加期待。至於角色陣容、故事細節以及其他製作資訊，官方亦預告會於稍後陸續公布，有興趣嘅朋友敬請留意後續消徒息。