由Capcom及傳奇影業聯製作嘅《街頭霸王》真人版電影，今日喺TGA 2025頒獎典禮上正式公開首部預告。角色造型還原度似乎唔錯﹐大家又期唔期待呢？

雖然預告只有短短45秒，並冇交代太多劇情，但就展示出眾多角色打鬥場面及其經典招式﹐例如「軍佬」古烈嘅後空翻腳刀、「蘇聯佬」桑吉夫嘅十字旋風轉、仲有阿隆嘅背摔等等。相比過去幾套荷里活真人版，即係1994年尚格雲頓主演嗰套，同埋2009年嘅《春麗傳》，今次嘅造型明顯做得更好，既保持到原汁原味，又唔會太過浮誇滑稽，難怪預告出街後，Youtube網民暫時都係讚多過彈。

《街頭霸王》真人版電影由《Bad Trip（不軌此行）》導演櫻井北尾執導。據官方介紹，故事設定在1993年，多年冇聯絡嘅街霸拍擋阿隆同阿Ken，因為春麗嘅召集而再次投身格鬥，參加新一屆世界格鬥大賽，展開一場拳拳到肉、殺機四伏嘅生死對決。但呢場比賽背後，其實暗藏一個致命陰謀，就係要迫使兩人正面交鋒，同時要面對各自嘅心魔，如果做唔到就會GAME OVER。電影預計2026年10月16日於美國正式上映。