隨住《怪奇物語（Stranger Thing）》第五季第2輯將於12月26日播出，官方今日公開全新預告。預計接下來幾集，劇情將會逐步揭開「顛倒世界（Upside Down）」背後嘅驚人真相，正如Dustin所講：「一直以嚟，我哋對顛倒世界嘅所有認知，其實全部都係錯。」

（以下含《怪奇物語》第五季第1輯劇透，未睇嘅朋友請注意！）

預告以美國傳奇天后Diana Ross嘅〈Upside Down〉作配樂，可以見到主角們分成幾批人馬，積極部署並展開擊殺大魔王Vecna嘅行動：Eleven嘗試說服Eight出手相助，一齊對抗 Vecna；而喺第1輯結局獲得神秘力量嘅Will，亦正思考點樣善用呢股新能力；被困在「暗域（Camazotz）」嘅Holly同Max亦開始有所行動。另一邊廂，Vecna則揚言時機已到，準備創造一個全新世界。

當然，要成功阻止Vecna，難免要付出重大犧牲。而預告入面就一幕幾明顯嘅「Death Flag」，就係Dustin同Steve立下生死誓言，齊聲講出「生死與共（You die, I die）」，令Fans們相當擔心兩人嘅安危，希望最後會冇事啦。

《怪奇物語》第五季第2輯（3集）將於12月26日播出，而長達2小時5分鐘嘅大結局，則會在2026年1月1日播出，上架時間均為香港時間上午9點。