唔知由幾時開始，YouTube嘅廣告愈出愈長，有時想睇一條3分鐘嘅短片，未睇到內容就先要硬食一條30秒嘅廣告，而且仲要冇得Skip，更加唔好提啲廣告內容有幾咁參差。想避開廣告﹐一係就訂閱YouTube Premium，又或者做「免費仔」用廣告攔截插件。不過，越南政府最近就推出咗項新法令，限制所有線上平台廣告，播放5秒後必須提供跳過選項，令唔少網民齊聲大讚「德政」。

據越南傳媒報導，最近越南政府日前通過咗一項名為342/2025嘅新法令，將於今年2月15日正式生效。新例限制所有線上平台，包括但不限於YouTube、Facebook、Instagram、X、TikTok等等，如果要喺影片中加入廣告，最多只可以讓用戶睇5秒，播放5秒後就必須提供「跳過」選項。

你以為關閉按鍵喺右上角？其實喺左上角！

除咗影片廣告，網站上嘅靜態圖片廣告、彈出廣告及橫幅廣告亦將受到限制，平台必須容許用戶能夠「即刻」關閉廣告，而且唔可以設定任何等待時間。更重要嘅係，平台唔可以再用埋啲古惑招，例如將個「X」掣縮到好細、收得好埋，又或者整啲假嘅「X」按鍵嚟誤導用家，所有關閉按鍵都必須清晰、易見、一撳即關。

越南政府同時強調，如果廣告商或平台收到當局通知，指某啲廣告內容違規（例如內容不當，或違反上述廣告規定），就必須喺24小時內將相關廣告下架。若然平台拒絕配合，政府有權採取技術手段，直接封鎖有關服務或廣告內容。