「請骷髏頭堡賜我力量...我己經充滿力量喇！」繼《Barbie》真人版電影大收旺場後，玩具商Mattel又再發功，將80年代經典卡通《He-Man》再次搬上大銀幕。隨住電影上映，睇嚟又會有一系列新玩具推出嚟轟炸大家嘅荷包。

呢部《He-Man》真人版電影《Masters of the Universe》講咗多年，期間經歷過無數次片商、導演同選角更換，終於喺今日正式公開首條前導預告。電影由《Bumblebee（大黃蜂）》導演Travis Knigh執導，Chris Butler撰寫劇本，而主角Prince Adam/ He-Man則由Nicholas Galitzine飾演。

當初公布選角嗰陣，可能因為Nicholas Galitzine拍過2021年真人版《灰姑娘》同BL電影《Red, White & Royal Blue（王室緋聞守則）》，唔少網民都覺得佢唔夠大隻、外形偏青靚白淨，未必撐得起He-Man嗰種典型美式爆肌英雄形象。不過睇返預告，雖然身形未去到原著卡通嗰種誇張程度，但明顯睇得出有認真操練過，肌肉線條清晰，加埋經典金髮造型同條底褲（呀...唔係，係戰衣先啱），還原度都算係咁，起碼唔覺有陣脂粉味。預告片中亦可見到冇膽貓（Cringer／Battle Cat）同大反派骷髏魔等角色。

根據官方劇情大綱，電影故事講述10歲嘅Prince Adam當年為躲避一場毀滅性內戰，乘坐太空船時意外墜落地球，並同神劍（Power Sword）失散，從此過住平凡人生活。直到差唔多20年後，已長大成人嘅Adam終於搵返佢把神劍，並重返故鄉永恆國（Eternia）保衛家園對抗邪惡嘅骷髏魔。不過要打贏骷髏魔，Adam必須先解開自己嘅身世之謎，正式覺醒，成為威猛嘅宇宙戰士「He-Man」！

其他演員陣容同樣星光熠熠，包括「武器大王養女」Camila Mendes、「骷髏魔」Jared Leto（配音及動作捕捉）、「邪惡女巫」Alison Brie、「武器大王」Idris Elba、「女魔術師」Morena Baccarin、「永恆國國王」James Purefoy 以及「永恆國皇后」Charlotte Riley等等。電影預計今年6月5日在美國正式上映。