之前我哋報導過Matt Damon及Ben Affleck批評Netflix嘅製作原則，指Netflix按觀眾數據要求電影「開頭五分鐘內就要有爆點」、「用對白重複講劇情因為觀眾玩緊電話」等；而近日又有荷里活創作人對Netflix嘅「演算法至上」策略作出公開批評，仲涉及超過1.5億美元嘅製作爭議。

《The Abandons》

圖片：RottenTomatoes

話說早前有媒體報導，指Netflix唔會續訂去年年尾開播，由Lena Headey（《Game of Thrones》中嘅Cersei）主演嘅西部劇《The Abandons》。而劇集嘅原製作人Kurt Sutter日前就於社交媒體發文狠批Netflix嘅決定。佢發文指：「親愛嘅Netflix，下次當恐懼迫使你選擇演算法而非創作者願景時，記住呢個選擇如何摧毀咗一個本來可以好美好嘅企劃。」暗指Netflix只顧演算法而缺乏對創作者嘅尊重。

貼文後半更指出係Netflix嘅決策失誤導致製作費掉咗落海。Kurt Sutter寫道：「FYI：股東們最痛恨的就是得知超過1.5億美金被浪費於一個節目上，試圖彌補領導層嘅不必要錯誤——這對荷里活及華爾街來說都是一個破壞性的趨勢。」假若Kurt Sutter所言屬實，亦即只有7集嘅《The Abandons》每集製作費達2140萬美金。

Kurt Sutter

圖片：Wikicommons

雖然《The Abandons》開播嘅觀看數字的確唔好，Netflix宣佈唔拍第二季似乎非常合理。不過Kurt Sutter講緊嘅可能並非單純「唔拍第二季」一事。早於2024年10月時，就有報導指Kurt Sutter因為與Netflix方面有重大創作分岐，於煞科前三個星期選擇離開劇組。而所謂嘅「重大創作分岐」，就係原本劇集第一集長達1小時40分鐘，但Netflix就要求將其拆成兩集並進行補拍，最終出街嘅第一集亦只有50分鐘。事實上《The Abandons》所有集數嘅時長都比一般嘅串流劇集短，大概只有40分鐘左右。所以Kurt Sutter真正投訴嘅，可能係Netflix方面因應觀眾觀看習慣而限制每集時長，導致創作方無法講出理想嘅故事。

另外，於Kurt Sutter發文後幾個小時，佢就修改咗帖文內容，表示「公司律師已經聯繫過我。我必須遵守具有約束力的協議」，並將原文中大量字眼，包括「Netflix」、「恐懼」、「演算法」、「創作者願景」、「摧毀」、「企劃」等。但就保留咗由新聞標題組成嘅電影海報式附圖。

資料來源：Deadline