曾於MCU飾演大反派「征服者康」嘅Jonathan Majors，自從因襲擊及騷擾前女友罪成後，事業幾乎全面停擺。事隔近3年，最近終於有片商向佢拋出橄欖枝，邀請佢出演一部尚未命名嘅動作驚悚片。

今次俾機會Jonathan Majors復出嘅，並唔係傳統嘅荷里活大片商，而係由美國著名保守派評論員Ben Shapiro創辦嘅右翼傳媒公司The Daily Wire。據報導，呢部電影將由Kyle Rankin執導兼編劇，暫時未公開片名、劇情及其他演員陣容，但有指故事風格將類似80、90年代嘅動作片《Red Dawn》與《Toy Soldiers》。

回顧返Jonathan Majors嘅事業起跌，佢原本憑住「征服者康」一角而星途無限，但喺2023年因涉嫌襲擊前女友Grace Jabbari而惹上官非，最終被法庭裁定襲擊罪及騷擾罪成。事件曝光後，迪士尼同Marvel火速割席，而原本嘅經理人公司同廣告商亦都棄佢而去，令佢由一線巨星瞬間跌落谷底。

其實The Daily Wire過去亦曾起用被荷里活主流圈子「Cancel（抵制）」嘅演員，當中較出名嘅例子，有被指性暴力同食人癖好嘅Armie Hammer，以及因「不當言論」而被踢出《The Mandalorian（曼達洛人）》嘅Gina Carano。對Jonathan Majors嚟講，今次合作可能係佢目前唯一可以浮返上水面嘅「救生圈」。至於佢有冇機會憑實力真正冼底、重返荷里活主流市場，就仍然有待時間證明。