日前Warner Bros.釋出《Dune 3》嘅前導預告，除咗新角色及劇情發展之外，影迷們最關心嘅或者係其上映日會否因為與Marvel嘅《Avengers: Doomsday》撞到應一應而改變。而事實證明Warner Bros.仍然企硬，將於今年12月18日正面同《Doomsday》硬撼。而隨住年尾逐步逼緊，有院線業者就非常擔心兩部戲同時上映會影響票房收入，不過仍然有人認為兩部戲可以雙贏。各位又打算入場睇邊套？定兩套都睇哂？

據《The Hollywood Reporter》報導，有部份院線業者對於《Dune 3》維持12月18日上映叫苦連天。佢哋嘅論點係，《Dune 3》及《Doomsday》是但一部都已經有足夠號召力坐爆所有戲院，依家兩部同一日上映就可能會導致部份人只能二揀一，唔單止影響電影票房，更重要嘅係影響院線嘅收入，對於過去幾年收入唔多好嘅院線黎講係一種「浪費」。而且佢哋亦唔信《Dune 3》及《Doomsday》可以做到之前《Barbie》及《Oppenheimer》嘅協同效果，事關兩部戲嘅目標觀眾群（偏向男性）高度重疊，唔少人因為時間、金錢等因素可能只能揀一部黎睇。

另一方面，兩部電影仲爭緊如IMAX等「巨幕影院」。大家都知睇IMAX戲飛係貴唔少，對於院線及電影公司黎講，成本無變但票價變高自然係好事，問題係院線根本無咁多巨幕影院可以同時上映兩部電影。目前估計以IMAX攝影機拍攝嘅《Dune 3》應該會於呢方面佔優，換言之《Doomsday》嘅票房就會相對受壓。此外12月其實仲有《Jumanji 4》、《Werwulf》等電影上映，《Dune 3》及《Doomsday》同樣會擠壓佢哋嘅票房空間，繼而影響戲院收入。

不過仍然有人認為兩部戲同日上映都可以雙贏。報導指有院線人士認為雖然巨幕影院會由《Dune 3》佔優，但出面仲有大把普通影院等住大家入場，所以實際票房影響有限。此外「聖誕檔期」本身亦係唔少人嘅信心來源。報導指出疫情前嘅12月聖誕檔期可以有6至10部不同規模嘅電影同期上映，雖然近幾年過大家入場意慾低咗、戲院又少咗，但要支撐兩部大作似乎亦唔係問題。

資料來源：The Hollywood Reporter