倉田保晌喺1971年嘅一次邵氏選角入面被睇中，皆因片商想搵一個真係識空手道嘅演員，結果百般武藝嘅倉田保昭就被選中，開始佢40年香港影壇生涯。倉田師父6歲時跟父親學空手道，由於武術天份極高，後來更學埋柔道同合氣道，大學時已經係空手道、柔道同合氣道高手，目前擁有空手道七段、柔道三段同合氣道二段資格。

早喺讀日本大學3年級時曾經坐船去過香港旅行，但當時正值67暴動，結果咩都冇得做，索咗啖香港空氣就返去，或者就係呢一啖氣令到倉田保昭同香港結下因緣。佢演出第一部港產片係張徹導演嘅《惡客》，自此就被定型做日本反派角色。難得嚟到香港發展，可以一圓做演員嘅夢想，但倉田保昭諗起一次入戲院睇午夜場時，觀眾見到佢被打死之後竟然開心到拍手掌。加上日本嘅母親當時喺報紙見到佢做壞人成日都好擔心，當時令佢係有啲難受，但明白到自己只係一名演員時就應該保持專業，所以就衝破咗呢個心理關口一直愈做愈好。

倉田保昭喺香港「打」出名堂後，返到日本人氣急升，更演出70、80年代風靡一時《猛龍特警隊》嘅草野刑事，喺日本人心目中嘅地位等同我哋嘅李小龍。後來再戰香港曾經同成龍、洪金寶、元彪同李連杰等武打巨星合作過兼交過手。曾經拍過《東方禿鷹》、《夏日福星》同《中華賭俠》等80、90年代經典動作片，近年就喺《新宿事件》同《精武風雲》客串演出，仍然霸氣十足，至今已拍超過100部電影，但仍戲癮未除。不過倉田保昭認為最深刻仍係同李連杰拍《精武英雄》嘅矇眼出打戲，拍足37日先完成呢幕經典打鬥場面。

雖然倉田保昭喺日本都有拍動作片，但日本觀眾唔似香港咁鍾意睇動作片，而且兩地動作片都有好大分別，當然唔係講緊日本動作片多數有愛情元素啦，而係日本動作片往往幾個動作就打完，倉田保昭就形容日本片就好似空手道，動作直線同比較直接。至於香港動作片就真係似返功夫，動作嘅變化多，娛樂性十足。

倉田保昭30年前已經喺日本開空手道道場，而佢決定喺香港開道場，原來係同日本311大地震有關，佢希望將面對逆境嘅精神帶到香港，利用武術教導大家處變不驚。倉田保昭目前已經70歲，但仍然好身手，有時更會親自教導，香港嘅道場練習係實戰空手為主，同一般教比賽用空手道有少少唔同，佢亦希望將道場發展成培訓教練嘅地方。

2011年成立創武館係想將日本武術精神同系統帶到香港，目的係想大家鍛鍊身心健康。倉田保昭話香港同日本年青人一樣，個個都係低頭族，甚至缺乏保護自己嘅意識，希望大家都可以透過練武強身減壓。道場成立以來一直都而，最近開始將電影結合武術，舉行咗一場殺陣講座，就連武痴區錦棠同香港戶山流洪森雄師父都有嚟觀摩。

殺陣可以解作武打場面，今次日本刀殺陣講座動作比較華麗，好多時都會用旋轉動作，展現力量同美感。雖然殺陣唔係真打，但唔代表可以hea打，用刀時動作由腰發力帶動，揮刀要快中帶勁，唔好拔刀之後搖擺不定，就連收刀之後都有技巧，要慢慢收刀先夠chok。殺陣當然同一般劍術唔同，殺陣動作咁有型，實戰就係另一回事，應該減少多餘嘅動作。暫時未知幾時會再有殺陣講座，不過道場就有開辦唔同武術課程同健身活動，最近更有教雙節棍添，有興趣就去望望啦。

倉田保昭空手道館
https://www.facebook.com/yasuakikurata.karate.dojo