要搵一個人生伴侶，最重要嘅唔係佢靚唔靚、身材好唔好(嗱，唔係「最」重要，唔代表唔重要架下)，而係大家能唔能有深層次嘅溝通。而文青覺得最簡單嘅測試方法，就係問佢細個睇咩卡通大－－即係我仲背得出151隻小精靈叫咩名學到咩招嘅同時，你同我講《妖怪手錶》喎，咁大家好難溝通架嘛！

如果真係比你搵到個身心靈都溝得好通、真係「很想去捕捉她」嘅女仔，咁你就要出絕招啦！例如拎個精靈球出黎掟佢！

OKOK，你鍾意嗰個係十優狀元、瘦底大波、仲靚到可以做港姐冠軍嘅級數，普通精靈球捉唔到？冇問題！佢哋仲有呢款高階版，除咗有好多粒石之外，物料仲可以選擇用鉑金(Platinum)，價錢盛惠6953美金，即係五萬三千幾港紙，都算係大師球黎啦！

咪住，咁萬一我條女唔鍾意《寵物小精靈》，而係鍾意《龍珠》、《Star Wars》、《美少女戰士》甚至《魔戒》咁點算？放心，人家PaulMichaelDesign旗下擁有N款以不同動漫電影為靈感嘅戒指，只要你符合兩個條件，就一定可以搵到隻啱嘅黎抱得美人歸。