圖：新華網

以前去中國踢波，唔係好似加斯居尼呢啲等退休，就係無料去歐洲，先會去中國屈就。不過今時唔同往日，「偉大祖國」主席習大大又出晒名係球迷，一眾富豪都落重本搞足球，一來可以面上貼金，二來又可以投政府所好，何樂而不為先？強國崛起，有的是人民幣，而家去強國踢波，真係身份嘅象徵嚟架，就算球員本身仲有能力喺歐洲搵食，都好難頂到人民幣嘅誘惑。以前轉會窗使得最多錢，一定係英超呀、西甲呀咁，今年冬季轉會，中超係全球使得第二多錢嘅聯賽，為一向無乜睇頭嘅冬季轉會帶嚟唔少花生。其實中國個轉會窗就仲有一個月左右先完，不如我哋講幾單由歐洲轉會去中國嘅轉會呢。

圖：新浪網

拉美利斯（車路士－＞江蘇蘇寧）

轉會費：2500萬鎊

2010年由賓菲加1600萬鎊轉會去車路士，基本上已經贏盡所有榮譽，加埋近幾年幾任車路士領隊都好似唔係好鍾意用佢咁，呢幾季出場機會都唔係太多，令佢更容易決定轉會去中超。有人話去中超變相令佢入選國家隊機會細咗喎，都唔係啫，泰迪利打緊山東魯能，羅賓奴打緊廣州恆大，咪照入國家隊。拉美利斯自己就話，中國係個新興市場，希望喺中國發現更多嘅新挑戰，並唔係純粹為錢咁喎（雖然佢都話江蘇蘇寧份報價好難拒絕），嗯！我哋都相信拉美利斯唔係為錢去中超架！（除非唔係）

至於車路士都好著數，佢地喺呢單轉會都淨賺900萬鎊。

圖：dailymail

積臣馬天尼斯（馬德里體育會－＞廣州恆大淘寶）

轉會費： 4200萬歐元

本身來自歐洲黑店波圖，實力「非同凡響」，效力波圖三季入咗67球嘅佢，去到馬體會半季竟然只係入得３球咁大把，最後淪為球隊第四前鋒，激到班馬體會球迷生蝦咁跳，球迷群體好多聲音希望佢早走早著。上年夏天為咗喺AC米蘭同阿仙奴手上爭佢返嚟出咗3500萬歐元，球員貨又交唔到，個價又摸頂，本來諗住都好難甩手，點知廣州恆大仗義相助，用4200萬歐元帶積臣馬天尼斯去強國。你係馬體會，梗係有咁快得咁快放人啦。馬體會就係咁淨袋700萬鎊歐元。

成單交易，邊個最開心？就係積臣馬天尼斯個經理人文迪斯囉！係呀，又係文迪斯呀，一季賺兩水佣喎，仲唔開心？亦有啲江湖傳聞話恆大係借呢單交易同文迪斯打好關係，希望將來可以簽到C朗拿度喎，我嘅回應係「繼續吹」。

 圖：twitter

謝雲奴（羅馬－＞河北華夏幸福）

轉會費：1500萬鎊歐元

阿仙奴球迷點會唔記得佢呀，當年打阿仙奴射波飛機又有，傳中傳到上觀眾席又有，槍手迷睇佢踢波幾十兩血都唔夠嘔。點之三年前加盟羅馬又搵到第二春喎， 近兩季表現雖然有少少滑落，不過仍然叫交到功課。至於河北華夏幸福就相當之進取，上季仲喺中甲時已經搵咗李鐵做領隊，擺明劍指中超，好可能簽罪人奴都只係大手招兵買馬嘅開始，都係嗰句，中國轉會窗仲有一個月先完呀！

幾單轉戰強國嘅球員都唔過30歲，本身又有一定實力，就算離隊喺歐洲都唔愁無班落，咁快離開歐洲當然係球迷嘅損失啦。而各大球會朝拜星級外援，其實對中國國家隊發展都弊多於利，既然買知名球星係咁易嘅，仲有邊個咁戇居搞青訓呀？早前中國U23喺奧運足球外圍賽又三連敗無緣晉級2016奧運，睇嚟中國足球發展仲有好長嘅路要行。

李羅渣

八十後、14年曼聯球迷、3年愛華頓球迷、演員、網台主持，真‧偽文青

鍾意睇戲睇書，又鍾意打泰拳，亦鍾意飲飲食食，特別係紅酒同打邊爐

總之動靜皆宜，又乜都想試，係一隻合成獸。