真．山寨？百變怪版寶可夢

文：MenClub 魏文青　　
POSTED ON 15 Mar 2016

自從「小精靈」變「寶可夢」，個感覺就同一個由細J到大嘅女神突然返咗大陸整容一樣，感覺陌生之餘仲多咗幾分山寨味。但其實任天堂不嬲都有出「山寨」版嘅小精靈週邊架！就好似黎緊推出嘅呢Set吊飾加公仔咁，你睇佢個樣幾山寨！

我知我知，我都知呢個「兩點一線」嘅樣，係百變怪黎！不過話說好一會兒前，日本嘅小精靈官方活動中就出現過一隻百變怪樣嘅比卡超，但有小朋友唔知佢其實係百變怪變嘅，以為佢係山寨版所以嚇到喊咗出黎！其實百變怪咁淡定嘅面口套落比卡超同小火龍到，呆下呆下咁都真係幾有喜感！就連之前出嘅杯緣掛飾都有隻隱藏版嘅「百變怪比卡超」架！

呢個百變怪系列於3月26日開始於日本發售，分別有吊飾同公仔兩組，每組都有比卡超、皮皮、奇異種子、小火龍同車哩龜五款，售價分別係1200Yen(公仔，約80HKD)及800Yen(吊飾，約55HKD)。
pokemon.co.jp