8K超高清淬煉大馬士革鋼劍

文：MenClub 魏文青　　
POSTED ON 26 Mar 2016

科技嘅發展，通常都係快過你人工嘅發展。當我考慮緊好唔好加多兩舊水買個全高清Mon嘅同時，攝影技術就已經去到可以拍8K超高清片。例如外國導演Phil Holland早排就用新出嘅RED Weapon 8K攝錄機試拍咗以下呢段淬煉大馬士革鋼劍嘅片！真係好震撼！

不過以一般家用設備，唔好講電話，就連用電腦睇4K都唔係個個得，更加唔好講8K－－首先你要有四個4K Mon。所以8K呢家嘢我哋都係得個知字就得。反而段片嘅內容就值得同大家介紹！片中嘅「鐵匠」Tony Swatton曾經為多套電影打造武器，仲曾經主持過網上節目「Man At Arms」第一輯、整過Wolverine個爪、隊長個盾等等武器。而今次佢整嘅就係一把用上大馬士革鋼所造嘅古羅馬角鬥士劍！
將鋼片與鐵片焊成一條加熱、拉長折疊，再打平，材料就會層層堆疊經打磨和熱處理後就會現出紋路成品
所謂大馬士革鋼，係指一種有獨特木紋紋路嘅高碳鋼，又稱烏茲鋼，因為中東大馬士革地區出產嘅刀劍大多使用呢種鋼材而得名。有睇過下外國小說可能都知大馬士革鋼係好嘢黎，但實際上嘅冶煉技術其實已經失傳。現代工匠們為咗造出同樣紋路，會將多塊鋼和鐵片疊成鋼條，加熱、拉長再折疊，有如酥皮一樣令材料不停堆疊，經冷卻打磨後就會現出紋理。而喺呢條長七分鐘嘅片段中，就可以見到Tony將原材料打成劍身、打磨、加上劍柄、裝飾等整個步驟！真係嘆為觀止架！

PHFX.com