圖片：chelseafc.com

車路士前日終於搵到下季正式領隊人選，一如外界所料，意大利國家隊領隊干地完成今屆歐洲國家盃賽事之後就會正式上任，雙方就簽咗三年約。可能個消息已經俾球迷消化晒，又唔見好多球迷有熱烈討論。表面上，車仔同擅打典型意大利防守嘅干地係一拍即合，加上佢重振祖雲達斯皇朝都有非常重要嘅功能，但事實係車仔有好多問題，睇黎佢就要好好考慮點樣處理。

圖片：skysports.com

眾所周知，今季車路士嘅轉會係非常輕敵，加上後防火速老化係今季一度跌至降班區主因之一。干地第一時間就需要諗定下季到底要入乜嘢人，同留乜嘢人。車仔仍然未同隊長泰利續約，照咁睇泰利離隊機會都幾大，雖然戰術上，泰利嘅剩餘價值上季都用到七七八八。只係如果佢離隊，隊中就無個靈魂人物，干地一定要考慮。

其他後防都唔使問，一定係要大執，上半季成條後防得艾斯派古達稱得上係正常人，睇怕而家都要一邊為意大利備戰，一邊為車仔後防搵人。同埋今季真正坐正嘅門將高圖爾斯就傳干地想放走，再買入修咸頓嘅費沙科士打喎，呢個就幾奇怪啦，同利物浦當年借走拉爾拿買米奴列有咩分別？

圖片：express.co.uk

至於進攻方面，英國傳媒反而好多風放。好似《鏡報》就話干地屬意留迪亞高哥斯達，而《每日郵報》就講咗好幾個人選，好似傳咗兩三季話離隊嘅卡雲尼、喺意甲已經入咗30球嘅希古恩、被賣去愛華頓嘅盧卡古同羅馬嘅尼恩高蘭都係干地心儀對像。老實講，車仔自從入買柏度之後，前場人腳應該有能力分擔夏薩特嘅進攻負擔，所以佢哋都打得起進攻足球，只係既然車仔搵得干地，睇黎嚟緊車仔都係打防守波居多。

圖片：Skysports.com

各位車迷會點評價夏薩特表現？嗱嗱嗱，唔好講人老母呀。我都明，全季一個聯賽入球都無，唔用助語詞又好難講得到肉嘅，點令夏球王復活又係干地另一個難題。夏生都算係可造之材呀，如果有高人指點，應該可以有返過兩季咁神勇嘅表現；又現實啲講呀，就算你打算賣佢走，都要有啲表現先得架。

圖片：Telegraph.co.uk

車路士一路都俾人批評唔肯重要年青球員，呢兩年車仔嘅年青球員都唔錯嘅，當然同曼聯曼城比呢就仲有距離，好似上季已經打緊一隊嘅法國中堅蘇馬假以時日都可以成材架。既然車仔嚟緊有咁多人要換，不如慳慳地睇下青年軍有無乜嘢明日之星啦。我個人希望干地可以俾多啲機會英格蘭勞夫斯卓克，身體質素強唔在講，中場仲可以打幾個位置，下季不如留個位俾佢啦。

圖片：chelseafc.com

下季車仔如無意外都好難有歐洲賽打，所需球員都唔會太多，到時真係精英中嘅精英先可以留低，加上又少條戰士，車仔英超一定搏到有英超冠軍為止，如果李斯特城真係可以拎到今季英超，下季衛冕已經有個勁敵。

李羅渣

八十後、１４年曼聯球迷、３年愛華頓球迷、演員、網台主持，真‧偽文青

鍾意睇戲睇書，又鍾意打泰拳，亦鍾意飲飲食食，特別係紅酒同打邊爐

總之動靜皆宜，又乜都想試，係一隻合成獸。

facebook: https://www.facebook.com/leerogerfcpage/