圖片:Dailymail

啱啱過去嘅星期真係籃球大晒，事關NBA 傳奇球星高比拜仁喺星期四就打咗佢嘅告別戰，個人連轟60分幫湖人反勝猶他爵士，為高比職業生涯劃上完美句號。咁點解講開足球嘅我又要講佢呢？大家都知，高比拜仁係忠實巴塞球迷。不過原來足球其實先係高比最鍾意嘅體育運動

圖片:sportskeeda

好多NBA球星都係足球迷大家都知，好似退左役嘅拿殊就係熱刺球迷兼股東之一，仲要踢得兩腳、馬刺嘅東尼柏加同賓施馬都係好老友、而贊奧比利更非常欣賞美斯。至於高比拜仁，童年喺意大利長大接觸得最多嘅運動就梗係足球啦，所以佢都係AC米蘭嘅球迷。基本上14歲前佢都係日日踢足球。直到返到美國佢先真真正正開始打籃球。

圖片:sina

咁童年踢足球又對佢打籃球有乜幫助呢？佢就話足球令佢更注重團隊精神，「細個時踢足球，令我腦同眼可以睇到三至四個人配合，而唔係一至兩個人。」如果你同時係NBA球迷，睇到呢度可能得啖笑，不過你唔好理，佢本人係咁覺得。

圖片:nba

如果要揀一個足球版嘅高比拜仁，佢又會揀邊個？３月時NBA就搵咗阿仙奴傳奇亨利問高比拜仁呢個問題，高比好快就答「就係佢面前呢個人（即係亨利）。」因為亨利同自己一樣都有「殺手嘅宜覺」同「具有野心嘅心態」搞到亨利鬼死咁開心，咁亨利都算幾實致名歸嘅。高比拜仁而家退休，唔知有無諗過得閒出嚟踢下波？佢有成6呎6寸高，好似伊巴謙莫域咁打前鋒都有得諗喎。

李羅渣

八十後、１４年曼聯球迷、３年愛華頓球迷、演員、網台主持，真‧偽文青

鍾意睇戲睇書，又鍾意打泰拳，亦鍾意飲飲食食，特別係紅酒同打邊爐

總之動靜皆宜，又乜都想試，係一隻合成獸。